【教學點滴】- 讚賞及鼓勵
- Aug 29, 2025
- 1 min read
想同大家分享一件感動嘅事。
我有一個輕度自閉症嘅學生，每堂除咗原本嘅訓練活動之外，都會用15分鐘彈琴。 開初用嘅樂譜係利用顏色代替黑色音符，到用普通琴書學習。當中假如有琴譜有任何新嘅元素要學，佢都會覺得好大壓力，我可以做嘅係不斷讚賞同鼓勵令他去面對同克服。
因為近幾次嘅樂曲難度高左少少 (其實都係初級嘅樂曲)，所以我每次都會先彈一次俾佢聽。平時嘅佢只會「眈天望地」咁聽。但有一次當我彈到中間，佢突然望住我講：「Vienna姐姐，你要加油呀 !」
我嗰刻由心笑咗出嚟，然後當我彈完，佢就好大聲拍手話：「好叻呀你！」
嗰刻我真係好感動，因為他真心想鼓勵同讚賞我，對一個有自閉症，社交唔係好好嘅小朋友嚟講好唔容易。佢咁樣讚一讚，攪到我面都紅埋！
跟住到他彈嘅時候，亦都好努力咁模仿我，慢慢彈首樂曲出嚟。
所以對於家長同老師所付出努力嘅「讚賞同鼓勵」，其實就係睇住小朋友快樂健康咁成長。
.
.
.
Comments